Milli- mənəvi dəyərlərimizi qoruyaq

 19 mart 2024-cü il Novruz bayramı ərəfəsində sonuncu dərs günü idi. Həmin gün həm də İlaxır çərşənbə olan Torpaq çərşənbəsinə təsadüf edirdi. Buna görə 102 nömrəli məktəbin 4A sinif şagirdləri dərsə milli geyimdə gəlmişdilər. Cədvəl üzrə keçilən  dərslərdən sonra “ Novruz adətlərimiz” adlı sinif tədbirinin  keçirilməsi planlaşdırılmışdı. 

Uşaqlar özləri ilə bəzəkli xonçalar gətirmişdilər. Bir qrup uşaq dərsə gələn şagirdləri mahnı oxumaqla qarşılayır, təbrik edirdilər. Hamının əhvalı şən idi. 

Dərslər bitdikdən sonra uşaqlar sinifdəki partaları təqdimat formasında düzdülər. Partaların üstünü səməni və rəngarəng bayram xonçaları ilə bəzədilər. Tədbirimizi açıq elan edərək, onun məqsədi və mahiyyətini şagirdlərimə açıqladım. 

Qızlar qrupu şən musiqi sədaları altında milli rəqsə başladı. Ardınca bahara aid şeir və tapmaca deyən uşaqlar çıxış etdilər.  Novruz bayramında olan adət-ənənələrimiz də qeyd edildi. 

Sonra “Süleymani” rəqsi ilə Məhərrəmov Ümid çıxış etdi. Digər oğlanlar da ona qoşularaq rəqs etdilər.  Qasımova Rüqayya “ Uzundərə” rəqsini, Muradlı Zəhra milli rəqsi gözəl ifa etdilər. 

Bayram tədbiri davam edirdi. Uşaqlar “ Kosa-kosa” oyunu oynadılar. Kosa rolunda Hacı Səid çıxış etdi. 

Novruz adətlərinə görə İlaxır çərşənbədə papaq atırlar. Bizim uşaqlar da qonşu sinfə papaq atmağa qərar verdilər. Qonşu 2A sinfinin şagirdləri sinif rəhbəri Əliyeva Səmagül müəllimə ilə birgə xalqımızın adətinə uyğun olaraq papağımızı xonçalarında olan milli şirniyyatlarla doldurub bizə qaytardılar. Uşaqların sevincinin həddi - hüdudu yox idi.

Tədbirin ikinci hissəsində müsabiqələrə başladıq. Müsabiqə 3 nominasiya üzrə oldu: 

1. “ Ən gözəl xonça”

2. “ Ən gözəl rəsm”

3. “ Ən gözəl rəqs”

Bu müsabiqədə uşaqların hamısı iştirak etdi. Qalibləri də özləri müəyyən etdilər. Qalibləri təbrik etdik. Beləliklə, “Novruz adətlərimiz” adlı tədbirimiz yekunlaşdı. 

Xalqımızın qədim milli adət - ənənələrindən olan Novruz bayramı milli - mənəvi dəyərlərimizdən biridir. Onu digər dəyərlərimiz kimi qoruyub saxlamaq, gələcək nəsillərə ötürmək hər birimizin mənəvi borcudur.

Tədbirdən video və şəkillərə buradan baxa

 bilərsiniz

İlk təbrik açıqçası

 Məktəbəhazırlıq qrupunun uşaqları 8 Mart Beynəlxalq Qadınlar Günü münasibətilə şeir söylədilər, mahnı oxudular və təbrik açıqçası yazdılar.

Video

“Yaşıl dünya naminə həmrəylik ili”ndə maraqlı tədbir

 Binəqədi rayon MKS-in əməkdaşları 102 nömrəli məktəbin şagirdləri ilə daim əlaqə saxlayır, maraqlı tədbirlər keçirirlər. Bizim 4A sinfi də fəallar sırasındadır. Kitabxanada keçirilən bu dəfəki tədbir ölkə başçısı cənab İlham Əliyevin Azərbaycan Respublikasında 2024-cü ilin “ Yaşıl dünya naminə həmrəylik ili” elan edilməsi ilə əlaqədar idi. 

4A sinif şagirdləri bu tədbirə ciddi hazırlaşmışdılar. Onlar təbiətə aid şeirlər öyrənmiş, rəsmlər çəkmişdılar. Bundan əlavə ağac tingləri və çiçəklər də hazırlamışdılar. Nəhayət, təyin olunmuş gün gəlib çatdı. Uşaqlar dərsdən sonra kitabxanaya getdilər. Kitabxana işçiləri həmişəki kimi bizi gülərüzlə qarşıladılar. Uşaq ədəbiyyatı üzrə bölmənin baş kitabxanaçısı Səidə xanım uşaqları bu ilin adının mahiyyəti haqqında ətraflı məlumat verdi. Sonra isə 4-cülər öyrəndikləri şeirləri və çəkdikləri rəsmləri  təqdim etdilər. M.Ə.Sabirin     “Ağacların bəhsi” şeirinin səhnəciyi də maraqlı təqdimatlardan biri oldu.  Ardı ilə baş kitabxanaçı Aygün xanım uşaqları əsas zala dəvət edərək tədbiri davam etdirdi. Burada ilk olaraq söz məktəbimizin gənc biologiya müəllimi Firəngiz Kərimliyə verildi. O, öz çıxışında ekologiyanın təmizliyinin , yaşıllıqların qorunmasının həyat üçün nə dərəcədə vacib olduğunu vurğuladı. Mövzu ilə əlaqədar maraqlı diskussiyalar, müzakirələr təşkil olundu. 

Nəhayət, tədbirin üçüncü, yekun hissəsində ağac əkmək üçün kitabxananın həyətinə çıxdıq. Burada xüsusi ayrılmış sahədə kitabxana işçiləri  uşaqlarla birlikdə körpə tingləri əkdilər. Uşaqların sevincinə səbəb olan bu inkişafetdirici tədbirə görə Binəqədi rayon MKS işçilərinə məktəb, müəllimlər və valideynlər adından təşəkkür edirik.