Son dərs günlərimiz

 Son dərs həftəsi 4-cülərin gərgin günləri idi. Bütün fənlərdən BSQ-lərin yazdırılması yorucu olmasın deyə, uşaqlara Texnologiya, Təsviri incəsənət və Musiqi dərslərində sərbəst mövzu üzrə iş verirdim. Texnologiya dərsində şagirdlərim əsasən plastilinlə yapmaya üstünlük verdilər. 2 nəfər isə kompüterdə proqramlaşdırma yolu ilə cizgi filmi hazırladı.

Scratch - proqramlaşdırma ilə cizgi filmi hazırladılar

 102 nömrəli məktəbin 4”a” sinif şagirdləri Əliyev Əliimran və Məmmədzadə Mirmöhsin Texnologiya dərsində Scratch proqramlaşdırma proqramı ilə cizgi filmi hazırladılar. Proqramı daha yaxşı bilən Əliimran filmin texniki tərəfini işlədi. Mirmöhsin isə “ ideya generatoru” rolunda idi. Afərin, uşaqlar! Sizə uğurlar!İnformatika müəllimlərimizin bu uğurda böyük rolu var. 

P.S. Qeyd edim ki, özüm Azərbaycanda ilk  “scratch”çılardan biri olaraq 2013-cü ildə Abdulla Qəhrəmanovun təlimlərində bu proqramın ilk addımlarını tətbiq etmiş və sertifikatla da təltif olunmuşdum. Sonradan istifadə etmədiyimə görə unutdum. İndi gərək Əliimrandan öyrənim.☺️

Son məşğələ günü

 102 nömrəli məktəbin 0”a” məktəbəhazırlıq qrupunun son məşğələsi oldu. Həmin gün uşaqlar əsl bayram əhval- ruhiyyəsi ilə məktəbə gəlmişdilər. Əllərində şar və gül dəstəsi ilə son dəfə məşğələyə gələn uşaqlar çox sevinirdilər. Axı onlar artıq məktəbəhazırlıq dövrünü keçmiş, məktəb illərinə qatılırdılar. Bu münasibətlə onların hər birinə sertifikat təqdim edib təbrik etdim. Təbrikə valideynlər də qoşuldu. Direktor müavini B. Quliyeva da uşaqları xüsusi olaraq təbrik etdi. 

18 may monitorinq başladı

 Mayın 18-də ölkə üzrə bütün dövlət ümumi təhsil müəssisələrinin IV siniflərində monitorinq keçirilirdi.

 

 Monitorinq tədris dili və riyaziyyat fənləri üzrə aparıldı. Qeyd edək ki, monitorinqin nəticəsi şagirdlərin summativ qiymətləndirmə ballarına, eləcə də onların sinifdən-sinfə keçmələrinə təsir göstərmir. 

 

Monitorinqin keçirilməsində məqsəd şagird nailiyyətlərinin yaxşılaşdırılması, məktəblilərdə müvafiq standartlar üzrə bilik və bacarıqların hansı səviyyədə formalaşdığının müəyyən edilməsi və tədrisin keyfiyyətinin artırılması istiqamətində tədbirlərin görülməsidir

Mənim dördüncülərim də bu monitorinqdə iştirak etdi.

. 

Bacarıqlı əllər

 102 nömrəli məktəbin 0a qrupunun əl işləri ilə tanış olun. Uşaqların plastilin, rəngli kağızlar, pambıqdan, zərlərdən applikasiyalar və digər işləri sinif guşəsini bəzəyir. Afərin sizə, bacarıqlı əllər!