27 Sentyabr Anım Günüdür

 102 nömrəli məktəbin 3A sinfi ilə 27 Sentyabr Anım Günü ilə əlaqədar sinifdə “Şəhidlər ölməz, Vətən bölünməz” adlı tədbir keçirdim. Sonra uşaqlar Binəqədi Rayon Mərkəzi Kitabxanasında qazilərlə görüşdə iştirak etdilər.

Şagirdlərimi vətənpərvərlik ruhunda böyütmək ən böyük vəzifəmdir.

Sosial davranış, əxlaqi dəyərlərin təbliği

Tarix: 20.09.2022

Sinif: 3

Fənn: Azərbaycan dili

Altstandart: 2.2.5.Mətndəki fakt, hadisə və obrazlara münasibət bildirir.

2.2.6. Mətnin məzmununa yaradıcı yanaşmaqla onu təxəyyülünə uyğun dəyişdirir və ya genişləndirir.

Mövzu: Anaya məktub mətninin təhlili. Epizod

Məqsəd: Bədii mətndəki obrazlara, onların davranışına, müəllif mövqeyinə münasibət bildirir.

Mətni məzmununa və janrın tələbinə uyğun dəyişdirir, genişləndirir və ya tamamlayır.

  Bu gün  Fərd və toplum bölməsinin Dürüstlük fəsli üzrə  2-ci dərs olan  “ Anaya məktub” mətninin təhlili; Epizod  mövzusunda dərsimiz haqqında fikirlərimi paylaşacağam. 

Bir gün əvvəl şagirdlərim “Anaya məktub” mətni ilə tanış olmuş, əsas obraza münasibət bildirmiş və əsərin ideyasını da müəyyən etmişdilər. Bu gün isə əsas qəhrəmanın hərəkətlərini analiz edərək,onun üstün və zəif cəhətlərini müzakirə etdilər. Müzakirədə fəal iştirak edən şagirdlərimin maraqlı fikirlərini müşahidə etdim. 

Ümumiləşdirib nəticələri qeyd etdik. Dərslikdəki tapşırığa əsasən cütlərlə işləyib mətnin məzmununda epizodları dəyişdilər, artırdılar. 

 Prosesdə bütün şagirdlərimin fəallığı müşahidə olunurdu. Cütlər təqdimat etdikcə, qalan uşaqlar diqqətlə dinləyir, bəzən sual verirdilər. Ən maraqlı təqdimat edənlər diqqətimi cəlb etdi. Zəhra və Aylin mətnin məzmununda digərlərinə nisbətən fərqli dəyişikliklər edərək məqsədə nail olduqlarını nümayiş etdirdilər.

Proqnozlaşdırma  üsulu ilə şagirdlərimin yaradıcı təfəkkürünün inkişafı məqsədilə dərsin təlim nəticələrinə nail oldum.

P.S. Bölmə üzrə kompetensiyalar:  Sosial davranış, əxlaqi dəyərlərin təbliği 

 

Qarabağ Azərbaycandır!

 15 sentyabr 2022-ci il yeni tədris ilində ilk dərs günümüz başladı. Əvvəlki təntənə, bayram əhvali-ruhiyyəsi olmasa da, yay tətilindən sonra yenidən məktəbə qayıtmaq üçün hamının darıxdığı hiss olunurdu.

 Rəsmi açılışdan sonra Vətən şəhidlərimizin əziz xatirəsini bir dəqiqəlik sükutla yad etdik. Azərbaycan Respublikasının Dövlət Himni səsləndi.Himndən sonra siniflərə daxil olduq və ilk dərsimiz başladı. Şagirdlərimə şanlı ordumuzun zəfər tarixini əks etdirən videofilm nümayiş etdirdim. Uşaqlar 44 gün çəkən və qələbəmizlə bitən II Qarabağ müharibəsi haqqında məlumat aldılar. 30 il işğal altında qalmış və 2020-ci il sentyabrdan noyabra qədər Ali Baş Komandanın əmri ilə rəşadətli ordumuzun igid əsgərlərinın qəhrəmanlığı nəticəsində əsarətdən azad olan ərazilərin adlarını bir daha təkrar etdilər. Qarabağımızın  nadir bitkisi olan xarıbülbülün şəhidlərin rəmzi olduğunu öyrəndilər. Azərbaycan Respublikasının Prezidenti Ali Baş Komandan İlham Əliyevin “ Qarabağ Azərbaycandır!” sözlərinin Qələbə simvolu kimi qəbul edildiyini və bunun mənasını anladılar. Filmi izlədikdən sonra şagirdlərimə Abbas Səhhətin “ Vətən” şeirini söylədim. Mövzu üzrə düşünüb müzakirə etmək üçün əvvəlcədən hazırladığım sualları səsləndirdim. Uşaqlar müzakirədə fəal iştirak etdilər. Hətta bu mövzuda şeir də bildiklərini nümayiş etdirdilər. Bir neçə şagirdim şifahi təqdimat edərək fikrini bildirdi. Yaradıcı iş olaraq “ Qarabağ Azərbaycandır!” mövzusunda esse yazmağı tapşırdım.

Şagirdlərimi vətənpərvərlik ruhunda tərbiyə etmək bir müəllim kimi vəzifəm, bir vətəndaş kimi mənəvi borcumdur.

Sertifikatlaşdırmadan uğurla keçdim

 

“ Suraxanı” gəmi- muzeyində

 Dərs ilinin sonunda 102 nömrəli məktəbin 2A sinfi ilə “Suraxanı” gəmi-muzeyinə ekskursiyaya getdik. Desək ki, maraqlı idi, azdır. Çooooxxx maraqlı idi! Bilirsinizmi, belə gəmi- muzey dünyada ilk muzeydir. “ Suraxanı” gəmisi vaxtilə nəhəng tanker olub. Tanker neftdaşıyan gəmi deməkdir. Muzeyin bələdçisi ilə gəmiyə daxil olduğumuz ilk andan gördüyümüz hər şey qeyri-adi, möcüzəli idi. İlk növbədə bizi gəminin kapitanı qarşıladı.Bizi salamlayıb,özü  haqqında məlumat verdikdən sonra sözü baş köməkçiyə verdi. Kapitanın baş köməkçisi də bizi gülərüzlə qarşılayıb salamlaşdı və gəmini seyr etməyə dəvət etdi. Deyəcəksiniz ki, burada qeyri-adi nə var ki? Qeyri-adi olan kapitan və onun köməkçisinin virtualda olması idi. Bəli, onlar canlı olmasalar da, yüksək kompüter texnologiyası canlı effekti əks etdirirdi. Sonra uşaqlar tonlarla ağırlığı olan əsl lövbər, bir qrup insanlar üçün xilasedici dairə ( bir həftəlik su və ərzaq paketi ilə),  xilasedici və qoruyucu kombinezon geyinmiş manikenlər, müxtəlif ölçülü qədim mayaklar, gəmilərin təmiri üçün dok və doka qaldırılma maketi və digər eksponatlarla tanış oldular. Gəminin bir seksiyasından digərinə keçdikcə marağımız daha da artırdı. Burada nələr yox idi! Müxtəlif tankerlərin maketləri, gəmilərin kompüter vasitəsilə idarə edilməsi, hətta virtual eynəklər də var idi. Bu eynəkləri gözə taxdıqda maşın hissəsində hərəkət edən  motoristləri canlı kimi görmək olurdu. Ən maraqlısı isə panoramalı muzey seksiyası idi. Burada vətənimizin tarixi, onun inkişaf dinamikası, soyqırımlar,  düşmənin vurduğu ziyan və  müharibələrə baxmayaraq ölkəmizin bir çox sahələrdə elmi texniki inkişafı və qalibiyyəti əks olunmuşdur.

Gəmi- muzey ekskursiyasından  çox məmnun olan şagirdlərimlə doğma məktəbə qayıtdıq.Ekskursiyanı təşkil edən “Məktəbli turları”na, menecer Səbinə xanıma, bələdçi Mələk xanıma sinif adından öz təşəkkürümüzü bildiririk.